di Fradel QUINTINO

Egregio Diretor,

co gran piaçer ò visto che su PAGINE VENETE ghe dazé la possibilità ai abonài de scriver in veneto che la xé la me gran passion in tel me ritiro, e alora ò pensà de mandarve un pochi de manoscriti de robe serie e de robe pì legere; dopo el vardarà lu se ai so letori le poderà interessarghe.

A ogni modo, se i scriti pì seri i fusse massa pesanti par el publico medio, intanto ghe scrivo su sta letera acompagnatoria na roba che de seguro la ghe piaze a tuti: la riceta de la pinza, un dolçe pòvaro ma tanto bon, tipico de la nostra tradizion popolare e ligà a le feste de sto periodo.

1 parte de farina de mais

1 parte de farina de formento

1/3 de la soma del peso de le farine in grasso (struto, de norma, senò butiro par la version “deluxe”) e zuchero

Uveta tanta come el peso del grasso

Zuca

Fetelete de pomo e de pero

Fighi sechi

Nose

Semi de fenocio

Codinzie (le sarìa la fruta a tochetini o fetelete, essicada su un filo a l’aria dopo averla impirà co na gusèla e picada via)

Lievito in polver

Graspa

Foje de cavolo

Sal

Se mete in te na caljera le dò farine col sal e el lievito (un sculiereto par ogni 500 gr. de farina) e se scota co na quantità de aqua bojente compagna al dopio del sò peso. Se stempera el tuto, stando tenti a non far grumi e se fa cozer par 30 minuti. Quando che se tira via da sora al fogo, se ghe zonta el grasso (struto o butiro), el zuchero, la uveta fata rinvegner in te la graspa e eventuali altri ingredienti a piaçer (par esempio zuca, fetelete de pomo, ecetera), ma badando de non passar via el peso de le dò farine. Se rimete sora al fogo e se mescola con vigor par ancora na diezina de minuti. Po’ dopo se versa el composto sora al tajer e quando che el se à ben rapreso, se lo avolge in foje de cavolo e se lo mete a cozer soto a le çendre del fogolar (o del falò de la Marantega). Senò se versa el contenuto de la caljera in te un stampo onto de grasso e se ghe fa far la grosta in forno.

In television i dizéa “Coto e magnà!” e mi ve auguro bona continuazion dopo le feste de Nadal, de far pulito e co la speranza che tanti veneti i trova el san orgolio de esser veneti, da le robe pì semplici, come le tradizion popolari, a le robe pì serie, come quele che ò tratà in tei manoscriti che ve ò mandà.

Grazie par l’atenzion, PAX VOBIS CUM – Fradel Quintino da San Zenon