di Fradel QUINTINO DA SAN ZENON

Chi che à avesto la fortuna de conosser sò noni in campagna, quando che ancora tuti i tegnéa le bestie par el sostentamento de la fameja – dal puner par le galine a le gabie par i cunici, fin a la stala par le vache – nol se sarà desmentegà che entro in te la stala ghe xèra un quadreto picà via apena passada la porta de ingresso che el rafigurava la figura de S.Antonio abate.

Questa la xèra na tradizion presente quasi da par tuto e no solche in tei Teritori Veneti, ma da noaltri la tradizion la assumeva le sò carateristiche tipiche, ligàe a la devozion popolare cristiana catolica che la xèra quel che tegnéa insieme tuto el popolo nonostante le diferenze.

Ma parché in te la stala? E chi xèrelo S.Antonio abate?

Intanto scominçiemo col dir che tanti i lo confondéa co S.Antonio da Padova – el Taumaturgo, el Santo par ecelenza – e no mancava la atribuzion de le prerogative del secondo al primo, come quando che i dizéa la filastroca “S.Antonio da la barba bianca, fame catar quel che me manca“, un ciaro riferimento a la invocazion al Santo da Padova che el vegnéa pregà inveçe col “Se quaeris miracula…” par el stesso motivo; ma la zente no la savéa ben che el primo el avéa vivesto in Egito in tel IV secolo fin de çento e passa ani (eco parché i lo rafigurava sempre co la barba bianca) e che el xé stà el fondador del monachesimo catolico, tanto da meritarse el apelativo de “San Antonio el Grando” o anca “San Antonio del Deserto”, e che inveçe el secondo el à vivesto in tel XIII secolo e el xé morto zovane, poco dopo dei 30 ani. Ma questo poco conta.

El fato el xé che el primo, un dei cusì diti “Pari del Deserto”, col passar dei secoli el xèra deventà el protetor dei animài par antonomasia, sora de tuto el protetor dei porçei, e se el Santo da Padova el xèra el Taumaturgo par la guarigion dei cristiani, inveçe s.Antonio abate el xèra considerà el “taumaturgo” par le bestie che, de sti ani, le xèra consideràe vitali e importanti quasi come le persone parché ghe ne dipendéa la sopravivenza de na fameja.

Sta imedesimazion del “Monego del Deserto” co le bestie mesteghe la nasse in Germania e la se difonde in tuta la region intorno a le Alpi e in Francia durante el Medioevo, par el fato che i moneghi de s. Antonio i prestava servizio presso de i ospedài che curava anca i poareti e la zente la usava arlevar un porçelo par ogni vilagio par darghelo ai moneghi, par reconossenza. I moneghi, par contro, i doperava la carne dei porçei par darghe da magnar anca ai malài par farli tornar in forze, in quei tempi de miseria, e i ricavava dal grasso anca unguenti e pomate par le piaghe. Par sto motivo, ai porçei destinài ai moneghi no se dovéa farghe del mal parché senò, se pensava, te averìa capità qualcosa de mal a ti o a la to fameja.

La rafigurazion de la iconografia classica la vede s. Antonio, spesso co la barba bianca, insieme co un porçeleto che à un campaneleto al colo par distinguerlo dai altri e la sò festa la casca el 17 de Zenaro, quando che la Cesa la usava darghe la benedizion a le stale, coi preti che i passava par le case aposta.

El xèra un mondo de dignitosa povertà e de zente che, tuto somà e co le sò ecezion, la xèra pì bona del dì de ancò; fursi parché la povertà condivisa fra tuti la te obliga a la umiltà, a la solidarietà in caso de bisogno e anca a sperar in tel aiuto del Signore, vardando in su par domandar che ogni tanto el vardasse in zò.