di Fradel QUINTINO da San Zenon

El “Mercole de le çendre” el segna, in tel Rito roman, el inizio de la Quaresima, overo del tempo liturgico “forte” e de ciamada special a la penitenza che la se finirà prima de la Messa in Coena Domini del Zoba Santo.

Le çendre le indica la natura provisoria del omo e quindi la sò condizion mortal, conseguenza del pecà original. Meménto, homo, quia pulvis es, et in púlverem revertéris, overo: «Ricordate (omo) che te sé polver e in polver te retornerà», la recita infati la prima formula liturgica (la unica in uso in te la «forma straordinaria» del Rito roman), fondàda sul testo de la Genesi (Gn 3,19) e declamabile dal sacerdote durante el rito di imposizion de le çendre. In alternativa el celebrante el pol pronunziar na seconda formula, introdota co la riforma liturgica del 1969, che la fa riferimento ai inizi de la predicazion de Jesù: «Convertìve, e credé al Vanzelo» [Paenitémini, et crédite Evangélio (Mc 1, 15)].

Par tradizion, le çendre meteste sora la testa dei fedeli le se ricava bruzando i rami de ulivo benedeti a la Domenica de le Palme del an prima. Oltre che in tel raconto che vien dopo del compimento del pecà original, pì volte in te le Sacre Scriture ricore el tema de le çendre come segno de la suplica che el omo, riconossendose creatura fragile e bisognosa de grazia, el ghe rivolge a Dio. Cusì, par esempio, dopo de la predicazion de Jona a Ninive – che el ciamava la çità a convertirse par no esser distruta da Dio – non solo i comuni çitadini i à bandìo on digiuno, ma anca el re «el se à levà su dal trono, el se à cavà via el manto, el se à coverto de saco e el se à sentà sora le çendre». In tel libro de Judita, quando che i Israeliti i xé assediài da le trupe de Oloferne e i xé ormai tentài de renderse, la xé la eroina che confida in tel Signore a portar el sò popolo a la liberazion, dopo aver fato penitenza e esserse cosparsa el cao de çendre. E anca la regina Ester la xé deventàda, a la stessa maniera, on strumento de salvezza.

El Mercole de le çendre el riciama la necessità par el omo de ritornar a Dio, come che la esorta la liturgia in te la prima letura («Ritorné a mi con tuto el cuor…»), e de fortificarse in Lu, rinunziando a le robe efimere par verzerse a quele eterne. El fedel el xé ciamà a conformarse al sò Signor e in sto senso el tempo de Quaresima el ricorda i 40 dì passài da Jesù – in digiuno e preghiera – in tel deserto. Dove, subito prima de scominçiar el sò ministero publico, el xé stà tentà dal diavolo, vegnendoghene fora da vinçitor.

La penitenza, sempre manco capìa dal mondo epur tanto pì indispensabile, la ghe iuta quindi al cristian a acetar le so croze e a superar le prove qua zò, in atesa de la ricompensa eterna. Nel speçifico del tempo quaresimale la lo iuta a prepararse e a parteçipar degnamente ai misteri de la Morte, Passion e Resurezion de Gesù. In che modo praticarla? El Catechismo insegna: «La penitenza interior del cristian la pol aver de le espression tanto varie. La Scritura e i Pari i insiste sora de tuto su tre forme: el digiuno, la preghiera, la elemosina, che i esprime la conversion in raporto a sé stessi, in raporto a Dio e in raporto ai altri» (CCC 1434).

Par el Mercole de le çendre i fedeli i xé tegnesti a osservar la astinenza da le carni e el digiuno. Come che indica el Codice de dirito canonico, la astinenza da le carni o da altro magnar la xé richiesta in tuti i vendre del an, fora che in tei dì dove che se celebra na solenità (can. 1251). El digiuno, che el fa parte del quarto preceto de la Cesa, el favorisse «el dominio sora ai nostri istinti e la libertà del cuore» (CCC 2043): esso el fortifica la volontà, el la libera da la sazietà de le robe efimere, orientandola sempre de pì a Dio. Par questo, la xé segno de vigilanza del cristian e, come che el insegna Jesù, de atesa del Sposo.